نوعيات من المجتمع

في البدايه أول ما قررت اسوي بلوج قررت اني اكتب فيه قصص وارجع امارس هوايتي القديمه وما كنت راح اتطرق لمواضيع سياسيه او اقتصاديه ، لكن اتصير مواقف اتخلي الواحد لازم يتكلم ويناقشها..

الصراحه انا مستغربه من الناس اللي تعرفت عليهم بعد ما اشتغلت، في الجامعه معرفتنا كانت محدوده على ربعنا اللي احنا نختارهم ونشتغل معاهم في مشاريع وتصادفنا اشكال غريبه بس ما كنا مجبورين ان نحتك فيهم . لمن بعد التخرج تغير الوضع وكانت الصدمه في الشغل لأن نضطر ان نحتك مع ناس غريبين وانصدمت من التطرف الديني والفكي والتمثيل....الخ

بعد هالمقدمه الطويله تبدي القصه، أول يوم داومت ساعات العمل من 8-4 سألت البنت اللي وياي وين تصلين جان تقولي أنا اصلي بالبيت لأني احط مكياج وما اقدر امسحه! المهم انا ما احب اتدخل الصلاه علاقه بين الانسان وربه. بس اللي صدمني اني تعرفت على وحده ثانيه متحجبه وما اتحط مكياج لأن يلفت النظر !! وكل شئ عندها حرام وعيب فرحتلها وقتلها مريم وين اتصلين؟ جان ترد علي ما اصلي بالدوام! قتلها ليش جان تقول مافي مكان للصلاة! المهم انا اللي صدمني هذي دينه ويقولون ما اتكلم الشباب واتعيب على لبس البنات !! بدال ما اتعيبين على الأوادم صلي عدل!

المهم ظلت علاقتي سطحيه معاها ومرت الأيام وقامت تمر علي مريم وتسولف معاي وتضحك عن عيالها وريلها ومره يتني جان تقولي اليوم بلوزتج قصيره ضحكت وقتلها لا عادي مو قصيره (وصج ما كانت قصيره) تبيني ألبس بلوزه لين اركبي! المهم حقرتها بعدين لا قامت تتمادى وتدخل شعرج .. لبسج..ومره يت جان تقولي انتي خوش بنت بس ليش ما تتحجبين! سكت جان اطالعها وقتلها: مريم الحجاب مو خرجه تنحط على الراس وان شاء الله اتحجب بس اهم شئ الإيمان قبل الحجاب! جان تقولي لا لا لا هذا فرض وما يجوز ويوم القيامه تتعلقين من راسج!وكل كلمات العنف! اهني عصبت وشبت عندي اللمبه الحمره!! جان اقولها وعمود الدين!! قالتلي شو؟؟ قتلها والصلاه اللي اهاي عمود الدين والإيمان والنيه الصافيه! وكل هذا ودينه! جان اقولها الواحد قبل لا يتكلم مفروض اشوف نفسه! ومايصير اتقيمين الناس على كيفج وتدخلين الناس النار والجنه على كيفج في رب بحاسبنا.. بس صج انصدمت من هالنوعيات الغريبه...والحين بقولكم قصه البنيه الثانيه هذي وحده فري وبالثلاثينات قامت اتيي وتسولف معاي وفجأة قامت تعطيني مواعظ دينيه ومحاضرات! ولازم اتسوين جذي وجذي وحكم! المهم دخلت على مكتبي جان تسألني اشقاعده اتسوين جان اقولها اسمع أغاني قتلها احب اشتغل واسمع أغاني وانتي يبي الأي بود يونس لما تشتغلين احسن من الهذره، جان تصدمني وتقولي لا (تتكلم بالانجليزي، اهي خريجة حكومه بس نوعها كشخه اتكلم انجليزي) المهم قالت
I dont prefer hearing music سألتها ليش؟ قالتلي ما أفضل آخذ أثام
(!!unless if I cant stand it)
انصدمت وحقرتها المهم في نفس اليوم قاعده مع رفيجتي (مو كويتيه) جان تقولها
(Oh my god I love to go clubs, am so open minded)
وتأشر علي وتقولها بس انا جدام الكويتين
(straight) !!

ياربي شالأشكال اللي احتك فيها طبعا هذا غير الدلع المصطنع والقصص الثانيه اللي لو بكتبها بسوي كتاب! بس السؤال اللي يدور براسي هل انا صدفه طحت في نوعيات جذي ولا صج المجتمع صار جذي؟!

ارجع اليك

ارجع الى رفيق دربي ..رفيق طفولتي بعدما هجرتك نعم هجرتك لسنوات وسنوات. كنت نعم الرفيق في مرحلة المراهقة والشباب .. هجرتك يا عزيزي بعدما كنت لي خير الصديق الذي يتحملني وانا اتكلم واكتب لساعات وايام و انت لا تمل و تمتص غضبي .. تظل تسمعني بلا سأم او ملل .. اعتذر اليك يا رفيق دربي لهجري لك لابتعادي عنك .. مهما ابتعدت ومهما ذهبت ومهما.. ومهما.. تظل انت صديقي الذي رافقني في وقت الشدائد والصعاب . ارجع اليك اليوم بكل شوق وحنين بكل حب اتذكر مدوناتي .. كتاباتي.. قصصي التي اكتبها معك ..اتذكر مشاعري التي كنت اشاركها معك .. اتذكر ايام مضت وليالي قضيتها بصحبتك اضحك تارة وابكي تارة من وحي الخيال الذي اختلقه.. ارجع اليك اليوم وانا متعطشه لعلاقتي الحميمه بك .. سأرجع لأقضي ما تبقى من حياتي مع رفيقي القلم